批注: 對身邊的人, 對國家, 又何嘗不是。一些人以為自己聰明, 笑別人蠢, 其實反映自己水平。

要小心: All talk, no action; sounds good, doesn't work. It won't happen.  

文章來源: https://www.patreon.com/posts/62528225

[情人節感言]唔一定要好識玩，就是堅定做好自己。

今日係2月14情人節，本身上星期個市大跌我都諗緊今日要再講一講個市，但係星期五果集錄音基本都中左個大方向，所以係咁大鑊既情況下，都仲有空間等聽日先Update。而且今日會有個閉門會議傾傾會唔會再加快加息，我認為可能睇埋今日先都唔係冇道理。所以唔會少左篇文，明天會講，今日情人節大哂啦好嘛？

今年我諗都冇諗過比上年更差，真係街都冇得出，飯都冇得食。都幾考驗剛一齊既情侶既感情。我同窮太一齊過左12個情人節，當然對我地影響不大，係屋企煮一餐好既已經好滿足，呢2年，冇野重要得過齊齊整整了。我成日都強調，唔好想像得我地太好，太恩愛，冇呢回事。呢個世界冇乜野童話式好多年既情侶，行得長久既，無非就係習慣左大家既缺點，知道對方係自己生命中既地位，堅定行落去。唔係一直好幸福快樂咁生活落去，想睇呢d去睇白雪公主。

我唔係一個咩好成功既人，邊一個方面都唔係。但我個人覺得，都so far so good啦！雖然我唔係，但我身邊唔少人都好成功，我都會總結下佢地經驗，學下野。我自己係理財blogger，好多野個mind set都同投資班財掛上左，不論愛情同投資，有好多人，提供左好多套路同方法令大家達致成功。但我咁多年自己經驗又好，觀念又好，就係2個要素，「真誠」同「堅持」。一個人唔洗好識玩，太識玩反而注定不能享受一切。

其實不論係咩都好，呢點都好重要。就係有愛，你要搵到錢，你要愛上你賺錢既果一範，你要投入。唔好當佢係duty，否則你會好痛苦。愛情會易明d，就係你唔好覺得做一d野，係你作為男／女朋友要做既。你一咁諗，你唔enjoy。到你一嘈交，你就會話之前自己為左對方點點點，人地又唔服，你又唔甘心，何必呢？我知道兩個畢竟係兩個個體，但兩個人係唔係可以行到長久，好大程度上係睇你地係互相較勁，還是合作應付「出面世界」？係諗「我」，定係「我地」？

其實我慶幸自己係後生果陣就開始左呢段感情，果陣我同窮太都係19－20歲。未係一個好識玩既年紀。其實人大左，如果你跌跌撞撞經歷過數段感情，你難免會識玩左。但一方面你以為自己識玩左，冇咁玩傷，其實同時都代表你冇咁意幸福快樂，因為你怕左投入，怕左付出。不是金錢，而是真感情。一段關係好大程度上建基於信任，你先保留，對方係會feel到，自然就後退。你可以不傷，但一段失去了都不痛既感情，係一段乜野感情呢？

身邊識我地既人，都覺得我地好難得，可以keep到咁多年，關係穩固。冇錯！恩愛我唔敢講，堅固既感情係真既！有時有朋友叫我分享心得，我都好怕，因為我一講會得罪好多人，因為呢個同你既價值觀有關。其實我會希望大家反思下，每一次既失戀係咩一回事。好多朋友會唔夠緣份，呢個係我覺得係好多人失敗既原因。其實緣份好夠，因為緣份能你地兩個相知相識。緣份令你地果刻撞到，互相欣賞。緣份好work架喇已經！你地行唔到落去，係你地唔夠盡力，唔係錯！只係唔夠盡力而已。點解？因為而家分開，再識過另一個人既成本太低，太易識人了，一刻既好感太易。反而對而家既人黎講，要堅持投放心機係同一個人，先係考驗。你可以唔要你面前呢個人，感情世界冇對錯，話唔定真係下一個更好。但係你唔好懶係冇緣份，係你地自己揀唔繼續。兩個人係埋一齊，多少係有一點傻的，因為冇人知未仔係點。好似搵工一樣，你永遠可以搵到更好。但愛情唔同，就算窮太下一個可能更好，我下一個可能更好都好。呢個唔係我地要考慮既野。我地要考慮既，就係我地點樣一齊更好，好過搵下一個。

所以，我看下見到keep得耐既關係，都係互相提升。以前後生我地好習慣討好另一半。但咁係冇用，係冇提升，只係投其所好。你扮得一時，扮唔到一世。呢個唔係你本性，你可以扮到熱戀期，過唔到磨合期。所以成日有人話，喂！佢以前唔係咁。係呀！因為以前係熱戀期，果個佢都唔係真，而家呢個先係真既。點解咁多人拍一年左右會分手，就係呢個原因。你因為求愛，向市場發布錯誤訊息。你溝到返黎既果個人，本身就唔係鍾意真正既你。咁到你有日唔扮野，佢咪會覺得你變左。咁你只係會累積到失戀既經驗，而無其他。因為呢次呢個鍾意呢d野，下一個就唔會。姐係下一次你又會扮過第種人。另外，其實我睇返上一代既人，點解好似冇我地咁易散？我最後得出既結論就係，社會文明左，我地比以前另加「尊重」個人，當我地太過諗自己，就會少左去諗「我地」。有問題，諗自己多Ｄ，自不然諗走，多過諗捱。

如果係咁，我會建議你努力變成一個，你自己想成為既人。完善而家既自己，咁你吸引到既人，本身就係欣賞你既人，就算冇，起碼有你欣賞你自己。我自問唔係一個愛情專家，我唔浪漫，唔溫柔。我識女仔好簡單，就係真誠。喜歡就說喜歡，想去一個地方就開口問。冇技巧，冇套路。一直都係出直拳，呢個世界永遠唔係最好打果個贏，係最後仲企係台上果個先係贏。