勉強無幸福

為人父母當然想子女好，但如果只有你覺得好，仔女唔覺得，你會迫佢認同你，定係退一步俾自由佢揀呢？好多父母過唔到呢關，覺得迫咗佢先算，咁就大錯特錯啦﹗

最近有世姪女同我訴苦，話阿媽唔准佢出夜街。佢剛剛中學畢業已經18歲，去街去到凌晨的話，阿媽又鬧又喊，永無寧日。我於是問阿媽點解唔准，阿媽就話因為阿女講大話，最初話10點回家，點知最後去到凌晨兩、三點。

我一聽就好認同，係認同阿女。阿女講大話，動機係咩？係因為逃避阿媽的責備，如果阿媽俾佢去夜街，自然唔需要講大話啦；講真話就唔俾去，惟有迫住講大話囉。

有交帶和照顧自己

好多人可能覺得我講緊歪理，但其實阿女都18歲，佢真係要去夜街，你可以點呢？就算佢去到唔返屋企，你報警都無人理啦。

阿媽唔俾去夜街，背後可能係擔心阿女行差踏錯，或者怕夜晚危險。老老實實，要行差踏錯日頭都可以錯；去夜街危險，人人都危險架啦。我就會教定阿女如何避開危險，行大街唔好行小巷，亦會要求佢報告行蹤，做一個有交帶的人，照顧好自己，咁就足夠了，一味唔准佢去，到30歲都可能唔識保護自己。父母一直鬧一直唔准，親子關係唔會好，當子女真係不幸去夜街時遇到壞人，你估佢仲敢返屋企講？佢會覺得你一定責備，而唔係支持佢。

記得我阿仔讀高小果陣，好沉迷玩《跑ONLINE》，有時甚至玩通宵唔瞓覺。我無唔准佢玩，因為根本無可能，我亦無責備佢，佢怕你鬧，咪唔喺你面前玩，你一轉身又玩過。

待機會教 幫助成長

如是者阿仔沉迷了打機近兩年，當時如果我忍唔住，可能都會喝佢熄機上床瞓覺，但我每次都好有愛好溫柔咁，勸佢唔好打咁夜，因為迫佢鬧佢，只會令佢有事唔敢同我講。

果然有日阿仔突然無打機，坐喺度喊，我問咩事，原來佢被人呃光武器，網上欺凌。我一句都無責備佢，反而同佢分析點樣公平地交易，點樣保障自己，點知對方係咪值得信，最緊要被人呃完，唔好再犯同樣錯誤。

子女沉迷打機，你會選擇迫佢定由佢？如果呢個話題令你地關係愈來愈差，惡劣到無偈傾，甚至變成敵對，當佢遇到問題困難唔敢話你知，咁呢個先係問題。到時你幫唔到佢解決問題，亦幫唔到佢成長。

阿仔最後慢慢無再沉迷打機，回想當日，好彩阿仔被人呃過武器，咁我先有機會教精佢如何小心騙子，否則大個上網先被人呃裸聊，响WeChat遇到倫敦金美女，咁就仲慘啦！勉強無幸福，等佢自願啦。

撰文：財叔
欄名：財叔小理 (10/08/2018 iMoney)
http://imoney.hket.com/article/2135074/%E5%8B%89%E5%BC%B7%E7%84%A1%E5%B9%B8%E7%A6%8F