要拿捏點樣做一個好男人，其實係一門好高深既學問。
三十幾歲人，出左黎社會工作十幾年，身邊一班朋友個個都撈得風生水起，響工作上如魚得水，遇神殺神，遇佛殺佛，偏偏響呢段時間，見得最多既就係兩公婆成日為左啲無謂野鬧交，搞到家嘈屋閉。
我一直認為，權力令人腐敗，更加會讓人性扭曲。阿文響公司裡面一人之下，萬人之上，對於工作非常之認真，對下屬佢亦非常之嚴格。基本上佢每落一個簡單決定已經係幾百萬既交易，同佢做野既同事冇返咁上下醒目都會因為做唔掂而辭職或者係被辭職。
好自然，放工後既阿文對太太亦如對下屬般相對嚴格。
有一次阿文抱住個仔入商場行街，佢老婆唔記得主動開門已經被阿文破口大罵，鬧老婆唔醒目，唔主動開門；老婆唔記得帶鎖匙返唔到屋企，阿文就鬧老婆蠢同冇記性；老婆問佢工作上既事情，想了解多啲，阿文就會同老婆講「講你都唔明」。
星期日同阿文一家人食飯，阿文個仔將枱上面既碗碟全部打爛晒落地，阿文見到又係咁鬧老婆冇睇住個仔，佢老婆就好無奈咁默默忍受。
我拉阿文去一邊，問佢點解要咁惡對阿嫂，阿文就話老婆唔醒目，成舊飯咁成日做錯野。我同阿文講：「你老婆唔係你既下屬，亦都唔係你既出氣袋，既然你講到自己咁醒，你做咩唔一早提佢，又或者你唔親自教佢點做？好似頭先小朋友打爛碗碟咁，其實你都有部份責任，點解只有你鬧阿嫂，唔係阿嫂鬧你？」說畢，阿文無言。
返回座位，阿文思考了片刻，佢用行動證明左自己既改變，有餸到就夾餸俾老婆食，有時間就幫手餵個仔食飯，等老婆可以休息，阿嫂見到就好溫馨咁笑左一下。
兩公婆又好，男女朋友又好，我從來覺得要一段關係要幸福持久，雙方一定要互相尊重同體諒，更重要既係當唔開心既時候要主動講出內心既感受，而唔係自己一個人默默承受。
真正鍾意你既人，一定會顧及你既感受，佢會care你，不過可能唔記得左點做同表達，做老婆既一定要將佢帶返正途，唔好俾工作令佢迷失心智。
以前既香港，大男人係代表心智唔成熟兼夾自私自利；
而家既香港，大男人係代表心智成熟兼夾可以俾家人倚賴。
而家既香港，大男人係代表心智成熟兼夾可以俾家人倚賴。
沒有留言:
張貼留言