「經理成日響房入面都唔知搞乜？」
呢個問題好多打工仔想問但係又唔敢問，如果同事問我呢句說話，我會好直接答佢：「我冇野做，啲野你搞掂得啦！」

我成日覺得一個管理層對於前線工作，唔應該干涉太多，唔係話唔理，而係有時候適度既寬鬆可以俾同事發揮，等佢地獲得工作上面既滿足感，就算就錯野俾客投訴都好，我心裡面已經一早有個預算，點投訴都唔死得人。

要成為一個出色同讓人心服口服既管理層，要既並唔係勤力，而係要用方法令到下屬比自己更加勤力，如果經理仲忙過下屬，我反而覺得呢啲叫做管理不善，冇適度發揮同事潛力。基本上每一個我工作既地方，我都係好Ｌ得閒，每日上網覆電郵，同VIP講下電話咁又一日，基本上其他工作都係交俾下屬搞掂，而出色既下屬亦都要靠自己煉成。

每個同事入職之前，我都有幾句說話會同佢地講：
1. 學無前後，達者為先
2. 只要肯付出，必定會有回報
3. 不恥下問，學到幾多野睇自己
4. 對外不亢不卑，對內互相尊重

每個同事基本上我都會親自教導佢地一次，去評估一下佢地既專長同工作能力，有啲人可能吹水好叻，有啲人文件處理做得好好，有啲人可能得過且過，總之目的就係盡可能放大佢地既優點，改善佢地既缺點。

開會期間，我會盡可能就每一個投訴做個案分析，講解自己既處理手法俾佢地參考，同時間分享自己以前既工作經驗，等佢地可以盡量響短時間裡面吸取更多知識。

同事覺得跟我做野有野學就留低繼續做，做得好，自然好快就升職加薪。亦因為有一個良好既工作氣氛，下屬唔會卸膊，反而希望主動跟進解決難題，爭取表現，一個良性循環就係咁樣煉成。

久而久之，個個同事俾我訓練到「遇神殺神，遇佛殺佛」，而我就變成咩都唔駛做。
朋友有一日黎辦公室探我，佢見我咁得閒，開玩笑問我返工好似唔駛理野咁，我好認真咁答返佢：
「我唔係咩都唔理，而係我信得過佢地。」

https://www.facebook.com/yungchoi2012/posts/389906894466321:0

無論職場家庭育兒都可以參考以上文章