是日噏day：偷食唔記得抺咀！4個低級錯誤

是日噏day：偷食唔記得抺咀！4個低級錯誤

呢兩日嘅城中熱話，一定係鄭俊弘偷食何雁詩事件。今晚嘅men’s talk happy hour，就用左呢件事嚟做case study。

陪審團一致認為，鄭俊弘的確係唔識食。講緊嘅唔係何雁詩夠唔夠正嗰種識唔識食，而係從鄭俊弘俾人揭發偷食嘅過程，睇得出佢有可能係偷情嘅神手，但係就絕對唔識乾手淨腳嘅小偷。

1、對象喺電話簿要改名是常識吧

朋友A：「喂依家佢俾人捉到成日send message同傾電話嘅，個名叫Stephanie Ho喎。斷到咁正，邊有得搞。偷情對象喺個電話入面，要改名基本上都係常識嚟架啦。

但在座各位，你哋同我定，我係唔會用大家個名嘅。因為我女朋友都識你哋，如果我啲女打黎顯示你哋個名，佢攞出黎聽，又或者下次問你地做咩半夜三間send message俾我，我咪死梗？所以我一般會揀一啲唔係好熟嘅男性朋友，例如男同事，將我偷食對象改咗佢哋個名，咁就穩陣啦。」

2、識食梗係搭的士啦

朋友B：「其實唔明佢點解要咁傻仔搭Uber，仲要用何雁詩個account，有晒record俾人check。你要去幽會，第一件事當然係唔會揸自己部車啦，咁易俾人認到。

但你以為搭uber好醒咩？一樣有記錄。其實最方便就係搭的士，無記認無record架嘛，就算俾人發現咗，你死口唔認的士入面嗰個係你，佢都吹你唔漲。最緊要你唔好醒目到拎的士單就得啦。」

3、勤力刪除記錄

朋友C：「其實啱啱話用另外一個人嘅名去取代偷情對象嘅做法，仲有一樣野好。就係你完完全全刪除左訊息記錄，又或者通話紀錄，都唔會覺得怪。因為對家個名如果係一個唔熟嘅朋友，你同佢完全冇對話，一啲都唔奇。但如果個名好似呢單野咁，對家叫Stephanie Ho， 你講到同佢咁熟，無對話內容，邊個信呀？

4、唔好做多餘野

朋友D：「既然係偷食，就千祈唔好做偷食以上嘅多餘野。所以我唔係好明點解鄭俊弘會諗住同何雁詩去租屋。做到要租屋呢一步，會唔會認真左少少呢？所以咪會俾人捉到囉！」

我：「其實如果雜誌報道係真嘅，我估佢同何雁詩都唔係偷食咁簡單，應該係諗住嚟真。但既然係諗住嚟真，點解又唔係乾乾脆脆一單還一單咁同原本個女朋友分左手，先同另外一個女仔一齊呢？其實鄭俊弘成單野最玩死自己嘅，就係呢樣野。其實堂堂正正同舊愛分手，開展新一段戀情，雖然都係會俾人講，但起碼都冇而家咁肉酸啦。」

朋友A：「你做咩突然講嘢咁正經，你女朋友裝咗偷聽器？」

我：「啲女人成日為埋係廁所度傾點樣殺男人你又唔知啫！不如轉場去唱K，突然想唱首《時代曲》——若註定這樣~ 故事尾聲方進場~別人話遲極了~願何雁仍為我留了座~~~」

text by 泰兄＜──facebook page

https://hkstylemen.yahoo.com/post/159259394506/%E6%98%AF%E6%97%A5%E5%99%8Fday%E5%81%B7%E9%A3%9F%E5%94%94%E8%A8%98%E5%BE%97%E6%8A%BA%E5%92%804%E5%80%8B%E4%BD%8E%E7%B4%9A%E9%8C%AF%E8%AA%A4